Ժամանակակից սանհանգույցի ինտերիերում տեղ ունի միայն ժամանակակից և ֆունկցիոնալ սանտեխնիկան: Եթե նախկինում սանտեխնիկա ընտրում էին միայն ըստ ստանդարտ գործառույթների՝ առանց ուշադրություն դարձնելու արտադրանքի արտաքին տեսքին, ապա այսօր ընտրության հիմնական շեշտադրումներից մեկն է դիզայնը և, իհարկե, ֆունկցիոնալությունը: Այսօր սանհանգույցը ոչ միայն սանիտարահիգիենիկ կարիքների համար նախատեսված վայր է, այլև բնակարանի ընդհանուր ինտերիերի լիակատար մաս։
Լոգարանը վերանորոգելիս ցանկալի է սանտեխնիկան ընտրել տան ինտերիերին համապատասպան: Այսօր ցանկացած ոճով (ժամանակակից, դասական, մինիմալիստական) ձևավորված տան համար հնարավոր է ընտրել համապատասխան ոճի զուգարանակոնք, քանի որ սանտեխնիկայի շուկան առաջարկում է բազմաոճ ու բազմատեսակ արտադրանք։
Ոճից ու դիզայնից բացի, զուգարանակոնք ընտրելիս հաճախ հարց է առաջանում, թե ինչպիսի զուգարանակոնք ընտրել՝ հատակի դասական զուգարան բաքո՞վ, թե՞ պատին ամրացվող կախովի զուգարանակոնք: Այս դեպքում անհրաժեշտ է հաշվի առնել նաև դրանց տեղադրման առանձնահատկությունները:
Հատակին ամրացվող զուգարանակոնքը չի պահանջում տեղադրման հատուկ աշխատանքներ, հեշտ է շահագործելն և պահպանելը: Ներկառուցվող զուգարանակոնքը տեղադրվում է պատի վրա և ունի գրավիչ, լակոնիկ ձև: Այս տեսակի զուգարակոնք տեղադրելով՝ բավական ազատ տարածություն կունենաք, ուստի սա հարմար է փոքր սանհանգույցների դեպքում, որտեղ յուրաքանչյուր սանտիմետրը կարևոր է: Այս տեսակի զուգարանակոնքի տեղադրումը ավելի աշխատատար է։ Նախ՝ պատի մեջ տեղադրվում է ջրահեռացման բաք, այնուհետև համակարգը ծածկվում է գիպսաստվարաթղթով և նոր միայն սալիկապատվում է։
Դիզայնի աշխարհում վերջին միտումներից է գունավոր սանտեխնիկան: Գունավոր զուգարանակոնքերը, լվացարանները, ծորակները, լոգարանի և սանհանգույցի այլ պարագաները գնալով ավելի տարածված են դառնում: Բավական տարածված է սպիտակի այլընտրանքը՝ սև զուգարանակոնքերն ու սանկերամիկան: Վառ գունավորմամբ զուգարանակոնքը կարող է լինել սանհանգույցի հիմնական շեշտադրումը:
Չմոռանանք անդրադառնալ նաև նյութերին, որոնցից պատրաստվում են զուգարանակոնքերը: Առավել հաճախ օգտագործվող հումքերն են սանիտարական կերամիկան (հախճապակի, ճենապակի), քարերը՝ մարմար, արհեստական քար, և մետաղները՝ չժանգոտվող պողպատ։ Բնականաբար, այս նյութերից յուրաքանչյուրն ունի իր առանձնահատկությունները, և ընտրություն կատարելիս անհրաժեշտ է հաշվի առնել նաև այս հանգամանքը:
