5 ամենապահանջված շինարարական գործիքները

Շինանյութի ժամանակակից շուկան հեղեղված է տարբեր ապրանքատեսակներով: Եկե՛ք միասին հասկանանք, թե այդ բազմազանության մեջ ինչն է հարկավոր հենց  ձեզ։

Բոլորիս տանն էլ կա մուրճ, պտուտակահան, աքցան, մեխեր, պտուտակներ, էլեկտրական ժապավեն և այլն։ Սակայն կան շինարարական գործիքներ, որոնք ցանկալի է ձեռքի տակ ունենալ, հատկապես, եթե սիրում եք ինքնուրույն վերանորոգել կահույքը,  բնակարանը, կամ ծավալում եք մասնագիտական գործունեություն:

5 ամենապահանջված էլեկտրական գործիքները

1. Էլեկտրական շաղափիչը (դռել՝ հարվածային և ոչ հարվածային) -ունիվերսալ գործիք է, որն անփոխարինելի է վերանորոգման, հարդարման, սանտեխնիկայի, ատաղձագործության և բազմաթիվ այլ աշխատանքների համար։ Այս գործիքի առավելությունն այն է, որ սրա օգնությամբ դուք կարող եք ոչ միայն փորել գրեթե ցանկացած մակերես (մետաղ, պլաստմասսա, փայտ, նույնիսկ բետոն), այլ նաև, հատուկ կցորդների առկայության դեպքում (բիթեր), պտտել և ամրացնել ցանկացած պտուտակ:
2. Անլար պտուտակահանը (շուրուպավյորտ) իր գործառույթներով (պտուտակներ հանել և ամրացնել) նման է շաղափիչին: Անլար պտուտակահանի առավելությունն այն է, որ այն կարող է օգտագործվել դժվար հասանելի վայրերում, որոնք հեռու են էլեկտրական հոսանքից: Գործիքն ունի բարձր շարժունակություն, մանևրելու ունակություն և փոքր չափսեր: Թերություններից թերևս նշենք այն, որ ունի ցածր հզորություն (շաղափիչի հետ համեմատած) և մարտկոցն արագ է լիցքաթափվում:
3. Հորատիչը (պերֆորատոր) շաղափիչի և մուրճի հիբրիդն է, որն արդյունավետ է ինչպես երկաթբետոնե սալիկների վրա երկարակյաց նյութեր և անցքեր փորելու, այնպես էլ պատերի և ներքին միջնորմների ապամոնտաժման, ինչպես նաև էլեկտրատեխնիկական կամ սանտեխնիկական աշխատանքների աշժամանակ ակոսներ անելու համար։ Տարբերակում ենք կենցաղային, կիսապրոֆեսիոնալ և պրոֆեսիոնալ տեսակներ։ Սովորաբար նախընտրելի են էլեկտրական մոդելները, սակայն կան մարտկոցով և բենզինով աշխատող տարբերակներ:
4. Անկյունահղկիչը (բալգարկա) բազմաֆունկցիոնալ գործիք է․ տարբեր սկավառականման գլխիկների շնորհիվ կարող է տարբեր գործողություններ կատարել․

• քար, կղմինդր, փայտ, բետոն, գրանիտ և այլն – կտրում կամ սղոցում.
• ժանգի, հին ներկի, ցեմենտի բծերի և այլնի մաքրում.
• ցանկացած մակերեսի փայլեցում և մանրացում՝ հղկող մածուկի և                                        հեղուկի միջոցով:

Իրականում, անկյունահղկիչը կարող է միաժամանակ փոխարինել  սրիչին, ոլորահատ սղոցին և էլեկտրական սղոցին:

5. Էլեկտրական շրջանաձև սղոցը (ցիրկուլ) նախատեսված է փայտից, նրբատախտակից, մանրաթելից, ՄԴՖ-ից, ինչպես նաև շիֆերից, պլաստմասսայից, գիպսաստվարաթղթից և լամինատից պատրաստված մակերեսների երկայնակի և լայնակի կտրման համար։ Կտրումը կարելի է անել ոչ միայն ուղիղ, այլև մինչև 45-50 աստիճան անկյան տակ։ Գործիքի դիզայնը հնարավորություն է տալիս կարգավորել կտրվածքի խորությունը և բացառել սխալ կտրումը։

Իհարկե, սա գործիքների ամբողջական  ցանկը չէ, բայց հիանալի բազային  հավաքածու է տարբեր շինարարական և տնտեսական աշխատանքներ իրականացնելու համար։ Եթե գործիքներն ընտրելիս կամ գնելիս դեռ կունենաք կասկածներ, ապա կարող եք դիմել մեր մասնագետներին, նրանք մեծ պատրաստակամությամբ կլսեն Ձեր նախասիրությունները, կառաջարկեն Ձեր կողմից սահմանված չափանիշներին և բյուջեին համապատասխան տարբերակ։