Խոհանոցը յուրաքանչյուր տան կարևոր անկյուններից է, ու քանի որ տնտեսուհիների ժամանակի զգալի մասն անցկացվում է այնտեղ, պետք է հատուկ ուշադրություն դարձնել խոհանոցի կահավորմանը: Լայն աշխատանքային սեղանը, ֆունկցիոնալ գազօջախը, ճիշտ ընտրված ու հարմարավետ սպասքը լուրջ ազդեցություն ունեն ամենօրյա կենցաղային աշխատանքի որակի վրա: Խոհանոցային լվացարանի ճիշտ ընտրությունը պակաս կարևոր չէ՝ սկսած լվացարանի մոդելից, վերջացրած որակական հատկանիշներով: Այս հարցում կարևոր են թե՛ նյութը, որից պատրաստված է լվացարանը, և որով պայմանավորված է երկարակեցությունը, և թե՛ դիզայնը, որը կարևոր է ներդաշնակ և իդեալական խոհանոց ունենալու հարցում:
Ներկայացնում ենք 3 չափանիշ, որոնք կարևոր են խոհանոցի լվացարանի ֆունկցիոնալության և օգտագործման հարմարավետության համար:
1. Լվացարանի ձևը
Խոհանոցի լվացարանը պետք է համապատասխանի ամենակարևոր չափանիշին՝ ունենա բավարար տարածք սպասք և մթերք լվանալու համար:
Օգտագործման համար ամենահարմար խոհանոցային լվացարաններն ըստ ձևի լինում են՝
1. Ուղղանկյուն կամ քառակուսի – Ամենաակտուալներից են, տարողունակ, հիմնականում ունեն հարթ եզրեր: Հարմար են թե՛ միրգ ու բանջարեղեն, թե՛ սպասք լվանալու համար: Կարող են տեղադրվել խոհանոցի տարբեր հատվածներում՝ համադրվելով կահույքի հետ:
2. Կլոր – Նորաձև են, տարողունակ ու հարմար խոհանոցային տարբեր աշխատանքների համար: Իդեալական կերպով տեղադրվում են աշխատասեղանի համապատասխան անկյունում՝ թույլ տալով առավել հարմարավետ դարձնել աշխատանքային տարածքը:
2. Լվացարանի թասը
Հարմարավետության տեսանկյունից շատ կարևոր է նաև, թե քանի թաս ունի լվացարանը:
- Մեկտեղանի լվացարանները ունիվերսալ են ու ամենատարածվածը, սակայն հարմարավետության տեսանկյունից զիջում են երկտեղանի և կից մասով լվացարաններին:
- Լվացարան կից մասով, որի կողային մասը կարող է ծառայել որպես չորանոց՝ առավել հարմարավետ դարձնելով լվացման գործընթացը: Հարմար է արդեն լվացված մթերքը կամ սպասքը տեղավորելու համար:
- Երկտեղանի լվացարանները ամենահարմարներից են, մի թասը կարող է ծառայել լվացման համար, մյուսը՝ որպես չորանոց: Հարմար է մեծ կաթսաններ կամ շատ քանակությամբ սպասք լվանալու համար:
Նշված դասական տարբերակներից բացի, ժամանակակից նորաձև խոհանոցային լվացարաններն ավելի ունիվերսալ են, նրանց թասերի դիրքն ու չափսերը կարելի է փոփոխել ու հարմարեցնել տեղում: Այսպիսի լվացարանին կից մասը կարող է լինել աջ, ձախ կամ անկյունային, թեք մակերեսով կամ ցանցակերպ, որի վրա շատ հարմար կլինի չորացնել արդեն լվացված սպասքը կամ միրգն ու բանջարեղենը:
3. Լվացարանի թասի խորությունը
Խոհանոցային լվացարանի խորությունը ևս ամենակարևոր չափանիշներից է, որից կախված է տարողունակությունը, հետևաբար նաև՝ աշխատանքի հարմարավետությունը: Սպասք լվանալու համար լվացարանի լավագույն խորությունը 15-22 սանտիմետրն է: Որքան մեծ լինի թասի խորությունը, այնքան ավելի հարմար կլինի տարբեր չափսերի սպասքը տեղավորելն ու լվանալը, իսկ ջուրն ավելի քիչ կցայտի լվացարանից դուրս: Այս հարցում արժե նկատի ունենալ նաև լվացարանի ծորակի բարձրությունը, որը պակաս կարևոր չէ հարմարավետության համար:
Ժամանակակից խոհանոցային լվացարանների թրենդային մոդելները իրենց հետ ունեն նաև ճկվող, երկարող և կարճացող ծորակներ, որոնց օգնությամբ հնարավոր է կարգավորել ջրի շիթի բարձրությունն ու անկյունը՝ կատարյալ դարձնելով լվացման պրոցեսը:
