Վերանորոգումն ավարտելուց հետո մենք կահավորում ենք բնակարանը, տեղադրում անհրաժեշտ կենցաղային տեխնիկան, և թվում է, թե կարելի միառժամանակ հանգիստ ապրել: Իհարկե, դա այդպես է: Բայց մեզանից շատերը սիրում են կատարել փոփոխություններ, նորամուծություններ, ստեղծել ավելի հարմարավետ պայմաններ իրենց բնակարանում: Օրինակ՝ դուք ճամփորդությունից բերել եք պատի օրիգինալ ժամացույց, կամ հյուրասենյակի համար պատրաստել եք հետաքրքիր դիզայներական վահանակ, գուցե գեղեցիկ նկար եք նվեր ստացել, ուստի հարց է առաջանում, թե ինչպե՞ս դրանք փակցնել։ Գործիքներ խնդրել հարևանի՞ց, թե՞ վազել շինանյութի խանութ: Իհարկե ոչ: Չնախատեսված փոքրիկ վերանորոգման աշխատանքների համար ձեռքի տակ ունեցեք «առաջին օգնության ճամպրուկ», որը հագեցած կլինի անհրաժեշտ շինարարական գործիքներով: Իսկ ի՞նչ պետք է պարունակի այս «ճամպրուկը»: Եկե’ք միասին նայենք:
Ձեռքի շինարարական գործիքներ
Կարող եք գնել անմիջապես պատրաստի հավաքածու, որն իր մեջ նախնական գրեթե ամեն գործիք պարունակում է: Բայց և այնպես մենք կփորձենք հավաքել մեզ անհրաժեշտ գործիքները.
1.Մուրճը (մեխով կամ առանց դրա) պետք կգա, օրինակ, պատին հայելի, դարակ, ժամացույց, նկար փակցնելու համար։ Ընտրեք նորարարական մոդել, որն ունի հարմարավետ ապակեպլաստե բռնակ, այն ավելի պրակտիկ է, քան փայտե տարբերակը: Ռետինապատ բռնակը չի սահում և հստակ ուղղորդում է հարվածները:
2. Պտուտակահան՝ հարթ (ճեղքավոր) և ձևավորված ծայրերով. սրա օգնությամբ շատ խնդիրներ են լուծվում. կարող եք ամրացնել կամ քանդել դռների կողպեքները, բռնակները, վարդակները, անջատիչները և այլն: Չմոռանանք նաև էլեկտրական տեխնիկայի հետ աշխատելու համար նախատեսված՝ ցուցիչով (ինդիկատոր) պտուտակահանի մասին:
3. Մանեկադարձիչը (ключи гаечные) օգտագործում ենք սեղանի, ռադիատորի, ծորակի պտուտակները ձգելու համար: Պետք չէ երկար մտածել, թե ինչ չափ ընտրել, կարելի է ձեռք բերել ունիվերսալ մանեկադարձիչ (разводной ключ): Իհարկե, լավ կլիներ ձեռքի տակ ունենալ վեցանկյուն պտուտակաբանալի, որը նախատեսված է վեցանկյունաձև խորշ ունեցող ամրացումների համար։ Այս ձևի ամրացումներով կահույքի տարրեր գնելիս ուշադիր եղեք, վեցանկյուն գլխիկը միշտ ներառված է: Պահպանեք այս փոքրիկ բանալին, այն ձեզ հետագայում բազմիցս հարկավոր կլինի:
4. Հարթաշուրթ և համաքցան. մասնագետները կվստահեցնեն, որ այս գործիքների միջև տարբերությունը զգալի է, բայց ոչ մասնագետ մարդիկ այդքան էլ ուշադրություն չեն դարձնում այդ տարբերություններին։ Երկար չմտածելու համար երկու գործիքներն էլ կարող եք ձեռք բերել, իսկ եթե, այնուամենայնիվ, պետք է ընտրեք, ապա գնեք տափակաբերան աքցանը, վերջինս օգտագործման մեջ բազմաֆունկցիոնալ է:
5. Տափակաբերան աքցանը և կծաքցանը նախատեսված են լարերը և մեխերը կտրելու համար:
6. Չափերիզը և շինարարական մակարդակը անփոխարինելի օգնականներ են: Առանց դրանց անհնար է հավասարաչափ կախել դարակը, տեղադրել կահույք և կենցաղային տեխնիկա։
7. Սիլիկոնե հերմետիկի ատրճանակը կլուծի սանտեխնիկայի արտահոսքի հետ կապված խնդիրները: Իհարկե, առանց հերմետիկի և մածկիչի չի լինի:
Էլեկտրական գործիքներ
Փոքր վերանորոգման համար նպատակահարմար չէ ձեռք բերել մեծ էլեկտրական գործիքներ: Ընտրեք կոմպակտ տարբերակներ:
1. Գայլիկոնիչ. փորձառու ձեռքերում և ճիշտ ընտրված գլխիկով այս բազմակողմանի գործիքը կարող է անցքեր փորել մետաղի, բետոնի կամ փայտի վրա, փայլեցնել և մանրացնել մակերեսները:
2. Անլար պտուտակահանը նախատեսված է պտուտակներ, ինքնակպչուն պտուտակներ ձգելու, քանդելու համար, անգամ դժվար հասանելի հատվածներում։
3. Անկյունահղիչ (բալգարկա) – օգտագործվում է տարբեր նյութեր (մետաղ, քար, պլաստմասսա և այլն) կտրելու, մաքրելու և մանրացնելու համար։ Դուք հազվադեպ կօգտագործեք այս գործիքը, բայց ճիշտ ժամանակին այն կարող է շատ օգտակար լինել:
Եզրակացություն
Հուսով ենք, որ մեր խորհուրդները կօգնեն ձեզ: Անհրաժեշտ շինարարական գործիքների «առաջին օգնության հավաքածու» հավաքելիս գնեք նաև ծախսվող նյութերն ու բաղադրիչները: Առանց դրանց աշխատանքային գործիքները կլինեն անօգուտ։ Օրինակ՝ մուրճը առանց մեխերի, պտուտակահանն առանց պտուտակների և այլն։
Եթե չեք կողմնորոշվում այս կամ այն գործիքը գնելու հարցում, դիմե՛ք մեր մասնագետներին, նրանք կպատասխանեն ձեր բոլոր հարցերին:
