Շատերն են ասում, որ սեփական տանը գործը երբեք չի ավարտվում, անկախ նրանից՝ դա առանձնատուն է էլիտար թաղամասում, թե փոքրիկ ամառանոց: Անխուսափելի իրավիճակներ միշտ էլ լինում են: Կա՛մ կարկուտն է ճեղքում տանիքը, կա՛մ քամին կոտրում այգու ծառի ճյուղը, կա՛մ ցանկապատն է խունանում արևի տակ, կա՛մ մոլախոտն է այնքան աճում, որ ծածկում է ծաղկանոցը և այլն։ Նման խնդիրներն ունեն լուծում, ուղղակի պետք է պատրաստ լինել դրանց: Մենք, իհարկե, կարող ենք դիմել համապատասխան մասնագետի, բայց դա միշտ չէ, որ հնարավոր է կամ տեղին: Օրինակ՝ եթե պետք է հյուրասենյակում նկար փակցնել կամ կտրել այգու ծառերի ճյուղերը, սա կարող ենք նաև ինքներս անել: Առանձնատան համար նախատեսված բոլոր շինարարական և այգեգործական գործիքներ գնելն անհնար է, բայց հիմնական գործիքների «հավաքածուն» կարելի է ձեռքի տակ ունենալ: Եվ այսպես. ի՞նչ կարող է մեզ անհրաժեշտ լինել:
Բազմաֆունկցիոնալ գործիքներ
Եկե՛ք ուսումնասիրենք ձեռքի և էլեկտրական գործիքները, որոնք կարող են օգտագործվել տարբեր տեսակի աշխատանքներում՝ փոքր վերանորոգումից մինչև լուրջ խնդիրների լուծում, և հավաքենք գործիքների ունիվերսալ հավաքածու:
1. Մուրճը ձեռքի գործիք է, առանց որի ո՛չ պրոֆեսիոնալը, ո՛չ էլ «ինքնուսը» չեն կարող աշխատել։ Եթե դուք ունեք մուրճ, ապա կարող եք ինքնուրույն, առանց արհեստավորի օգնության փակցնել ժամացույց կամ նկար, ամրացնել դարակները, փայտե ցանկապատ վերանորոգել կամ երեխաների հետ թռչնաբույն պատրաստել։
2. Աքցան և հարթաշուրթ: Մեզանից շատերն այս տեսակի բոլոր գործիքներն անվանում են ռուսական բառով՝ «պլասկագուբցի» և չեն կարևորում դրանց միջև եղած տարբերությունը։ Եթե դուք չեք ցանկանում գերբեռնել ձեր գործիքների պայուսակը, ապա նախապատվությունը տվեք հարթաշուրթին, որոնք բազմաֆունկցիոնալ են:
3. Պտուտակահանը (փեղկավոր, ճեղքավոր և վեցանկյուն) նախատեսված է աթոռների, սեղանների, զգեստապահարանի դարակների, մանկական խաղալիքների և այլնի վրա եղած պտուտակներն ամրացնելու կամ հանելու համար:
Խորհուրդ. Մուրճ, հարթաշուրթ կամ պտուտակահան գնելիս նախապատվությունը տվեք ռետինե բռնակներով մոդելներին:
4. Շինարարական հարթաչափը (լազերային կամ ձեռքի) կօգնի ձեզ ճշգրիտ չափել, նշել և կախել ամեն ինչ: Այս գործիքի շնորհիվ դուք կարող եք հեշտությամբ և ուղիղ կախել վարագուրի կախիչը, լոգարանի սալիկները, հավասարաչափ ներկել պատերը:
5. Գայլիկոնը բազմաֆունկցիոնալ էլեկտրական գործիք է: Կախված աշխատանքի ծավալից՝ դուք կարող եք գնել հարվածային կամ ոչ հարվածային գայլիկոն: Օգտագործելով գայլիկոնիչի տարբեր գլխիկներ, դուք կարող եք փորել փայտ, մետաղ:
Խորհուրդ. Էլեկտրական գործիք ընտրելիս նախապատվությունը տվեք անլար մոդելներին: Անլար տարբերակները կօգնեն հեշտությամբ աշխատել ամենաանմատչելի վայրերում և չվախենալ հոսանքի պատահական անջատումներից: Բայց, իհարկե, երկար աշխատանքի համար դուք պետք է ձեռքի տակ ունենաք մի քանի մարտկոց։
6. Պտուտադարձիչն ավելի թույլ է, քան գայլիկոնիչը, բայց մանր վերանորոգման և դեկորացիաներ ստեղծելու համար շատ հարմար և հեշտ տարբերակ է։ Անհրաժեշտության դեպքում, նույնիսկ կանայք և աղջիկնրը կարող են դրանով աշխատել:
7. Անկյունահղկիչ կամ բալգարկա: Ունենալով անկյունահղկիչի տարբեր սկավառակներ՝ դուք կարող եք կտրել ամեն ինչ. մետաղ, քար և փայտ, մաքրել և փայլեցնել մակերեսը:
Գյուղատնտեսական և այգեգործական գործիքներ
Ունենալ առանձնատուն՝ նշանակում է կից ունենալ նաև հողատարածք: Այստեղ կարող է լինել խոտածածկույթ, ծաղկանոց և ծառեր (դեկորատիվ կամ պտղատու), որոնք էլ մշտական խնամքի կարիք ունեն: Որպեսզի ամեն անգամ պրոֆեսիոնալ այգեպանի ծառայություններին չդիմեք, գնեք մի քանի անհրաժեշտ այգեգործական գործիք.
• բահ
• էտող կտրող մկրատ
• սղոց (ձեռքի սղոց, էլեկտրական, մարտկոցով կամ բենզինե «Դրուժբա»)
• խոտհնձիչ
Առանձնատունը մշտական խնամք է պահանջում։ Անհնար է անընդհատ մասնագետի ծառայությունների դիմել, այնպես որ ձեռք բերեք «առաջին օգնության» գործիքներ: Դրանք նման են շտապ օգնության մեքենայի, որը օգնության կգա դժվարին պահերին:
